ကမ္ဘာကျော် ရက်ပ်ပါအဆိုတော် အက်မီနမ်ရဲ့ Godzilla သီချင်းဟာ လက်ရှိမှာ ဗီဒီယိုအဖြစ် ထွက်ရှိလာခဲ့ပါပြီ။ အစောပိုင်းမှာ သီချင်းသီးသန့်သာ ထွက်ရှိထားပြီး ပရိသတ်တွေ အကြိုက်ဖြစ်ခဲ့တဲ့ သူ့သီချင်းဟာ ဗီဒီယိုမှာလည်း ထူးခြားတဲ့ တင်ဆက်ပုံ ဖန်တီးမှုတွေ ပါဝင်လာတာကြောင့် ပိုပြီး ပြည့်စုံခဲ့ပါပြီ။ ပိုပြီးထူးခြားခဲ့တာက သူ့ရဲ့ အသစ်ထွက်လာတဲ့ ဒီ ဗီဒီယိုထဲမှာ လက်ဝှေ့ကျော်ဟောင်းကြီး မိုက်တိုင်ဆန် ပါဝင်ခဲ့သလို သူ့ရဲ့ မွေးစားအဖေလို့တောင် ပြောလို့ရတဲ့ ရက်ပ်ပါဂုရုကြီး ဒေါက်တာဒွေးတို့ ပါဝင် သရုပ်ဆောင် အားဖြည့်ထားပါတယ်။ သူ့သီချင်းတိုင်းဟာ ထုတ်လိုက်တိုင်း ပေါက်အောင် ပရိသတ်တွေအပေါ် စေတနာတွေများခဲ့ပြီး ယုံကြည်ရာ ဂီတကို တစ်စိုက်မတ်မတ်နဲ့ လုပ်ကိုင်ပြီး လက်ရှိအချိန်ထိ ပုံရိပ် ကျမသွားဘဲ အောင်မြင်မှုတွေ ရရှိအောင် ထိန်းသိမ်းထားနိုင်ပါတယ်။ ဒီဗီဒီယိုဟာ ပြီးခဲ့တဲ့ တနင်္လာနေ့က ထွက်ရှိခဲ့ပြီး အမိုက်စားပြကွက်တွေ၊ သူ့ရဲ့ ဆိုပေါက်တွေနဲ့ ထပ်ပြီး ပရိသတ်တွေကို ကိုင်လှုပ်ခဲ့ပြီး Youtube ကြည့်ရှုသူတွေလည်း တရိပ်ရိပ်နဲ့ တက်လျက်ရှိပါတယ်။